Струки
Струките и образовните програми на ДСУ-РЦСОО „Никола Карев“ – Струмица со четиригодишно и тригодишно траење. Описите се од официјалниот Водич низ квалификациите во стручното образование.
Четиригодишно образование
Струки со четиригодишно образование: електротехничка, машинска, текстилна, градежна, дрвна, сообраќајна. Подолу се официјалните описи на квалификациите и подрачјата на вработување од државниот водич.
Електротехничка струка
Компјутерска техника и автоматика
Квалификација: Електротехничар за компјутерска техника и автоматика. Врши интервенции од електротехничка природа на ИКТ опрема и автоматизирани процеси; програмира компјутерски системи и автоматизирани процеси со примена на програмски јазици; самостојно работи со бази на податоци; инсталира, одржува и сервисира компјутери, компјутерски мрежи и периферна компјутерска опрема; работи со интелигентни системи и роботи; извршува интервенции при визуелна и програмска изведба на веб-страници и применува стандарди при работа со компјутерска технологија.
Можности за вработување: Во различни работни средини како што се: ИКТ индустријата, компјутерски мрежи, интелигентни и роботски системи, веб-дизајн, производство, пренос и дистрибуција на електрична енергија, осветлување на отворени и затворени површини, автоматизирани индустриски погони, станбени објекти, установи за јавни услуги, медиуми, установи за туризам, угостителство, образование, наука, здравство, земјоделие и др., како и сопствен бизнис. Работни задачи на пример: техничар за роботика и интелигентни системи; оператор на бази на податоци; техничар за процесна автоматика; техничар електроничар за компјутери; техничар за компјутерски системи и мрежи; веб-техничар; техничар на ИКТ за поддршка на корисници и други места согласно квалификацијата.
Електротехничар енергетичар
Квалификација: Електротехничар – енергетичар. Изведува и одржува електрични инсталации на станбени и индустриски објекти; врши мерења во електрични инсталации; изведува работи за функционирање на заштитно и громобранско заземјување; поврзува разводни ормари, мерно разводни ормари и разводни табли со соодветни спроводници и кабли; монтира елементи од надземни и подземни енергетски водови и мрежи; изведува електрични инсталации за работа и управување на електрични машини и електромоторни погони и изведува, сервисира и одржува нисконапонски и среднонапонски електроенергетски објекти; применува манипулации со расклопната опрема во електроенергетските објекти; предлага мерки за подобрување на енергетската ефикасност.
Можности за вработување: Производство, пренос и дистрибуција на електрична енергија, осветлување, индустриски погони, станбени објекти, установи за јавни услуги, сервиси за куќни апарати, медиуми, туризам, угостителство, образование, наука, здравство, земјоделие и др., како и сопствен бизнис. На пример: електротехничар за електрични инсталации и осветлување; за комуникации, мерења и управување во електроенергетиката; за производство, пренос и дистрибуција на електрична енергија; оператор на електрични машини и електромоторни погони; оператор на електрични апарати и уреди за домаќинство и погон.
Машинска струка
Техничар за производно машинство
Квалификација: Машински техничар. Изработува техничка и технолошка документација за обработка на металите со режење и пластична деформација; ракува со алатни машини; изработува метални конструкции; изработува и одржува алати и изведува заварувачки работи; ракува и програмира CNC машини; планира, организира, следи и оптимизира работа, решава проблеми, контролира квалитет на алати, уреди, материјали и производи, согласно со проектната документација.
Можности за вработување: Оператор на технологија на обработка на метали со деформација и режење; оператор на технологијата за изработка на метални конструкции; алатничар; оператор на технологијата на заварување; оператор на CNC машина; изработувач на CNC програми; соработник за техничка документација во машинството – во претпријатија за изработка и монтажа на конструкции, преработувачката и автомобилската индустрија и каде што има машини и постројки.
Машински техничар за моторни возила
Одржува, сервисира и поправа моторни возила, но и учествува при нивното производство; организира и врши надзор над одржувањето и поправките на моторните возила, дијагностицира неисправности на моторното возило, проверува, подесува и поврзува делови и системи на моторното возило и организира постапки во производниот процес на моторните возила.
Можности за вработување: Дијагностичар на неисправности на возила; механичар и монтер на мотори и моторни возила; оператор на технологијата на производство и одржување на мотори и моторни возила; соработник за техничка документација во машинството во индустријата за производство на моторни возила и делови, сервиси, технички прегледи, автосалони, резервни делови, возен парк, јавен превоз – како и сопствен бизнис.
Сообраќајна струка
Техничар за патен сообраќај
Придонесува за безбедност во сообраќајот, врши снимање на сообраќајот, изработува табели и графичка слика, уредува технички карактеристики на крстосниците и другите сообраќајни површини и сообраќајната сигнализација, утврдува режим на сообраќај; организира, реализира и следи транспортен процес при превоз на патници и товар во внатрешен и меѓународен сообраќај; ја потврдува техничката исправност на возилата и задолжителната опрема; презема мерки за правилен увид на сообраќајна незгода; применува прописи од областа на сообраќајот и логистиката, безбедност при работа и заштита на животната средина.
Можности за вработување: Оператор за регулирање и безбедност на патниот сообраќај; диспечер во патен сообраќај; оператор за организација на патен сообраќај; оператор за експлоатација на патни превозни средства; оператор за увид во сообраќајна незгода; оператор за складирање и други работни места во доменот на патниот сообраќај.
Техничар за транспорт и шпедиција
Планира, организира, реализира и следи извршувањето на транспортот на патот од прием до испорака на пратките; врши прием и чување на стока во складиште, ракување и испорака; извршува шпедитерски работи и координира учесници при транспортот; спроведува царински формалности; собира и обработува документација за прием, царинење, транспорт, отпрема и допрема; применува прописи од сообраќајот и логистиката и ИСО-стандарди.
Можности за вработување: Оператор за транспорт; шпедитер; шпедитерски царински застапник; оператор за складирање и други работни места во шпедицијата, или сопствен бизнис.
Текстилна струка
Техничар за моделирање на облека
Креира модел, утврдува мерки, рачно и компјутерски; црта основна конструкција, планира и подготвува ресурси за изработка на пробен модел; работи на современи CAD и CAM системи; моделира и градира кројни делови и изработува пробен модел.
Можности за вработување: Дизајнер на облека; оператор за кроење, шиење и доработка на облека и други работни места од секторот.
Техничар за дизајн на облека
Дизајнира и изработува модна скица и колекција според правила и побарувања на клиенти; дизајнира по сопствена идеја или налог со ликовни принципи; користи софтвер за модна и кројна слика; изработува кројни делови, комплетирање и моделирање, декорира пробен модел; планира ресурси за комплетна изработка на пробен модел.
Можности за вработување: Дизајнер на облека; моден стилист; оператор за кроење, шиење и доработка на облека и други работни места согласно квалификацијата.
Градежна струка
Градежен техничар
Оспособен за изградба на безбедни, функционални и одржливи објекти согласно проектна документација; изработува техничка документација врз основа на проект; собира понуди согласно предмер-пресметка; планира техничка документација и ресурси за изведба на градежни работи (механизација, работна рака, материјали); врши надзор на изведба и контрола на вградени материјали и квалитет.
Можности за вработување: Соработник за техничка документација за градежни работи и оператор за изведба и контрола на градежни работи.
Дрвна струка
Техничар за мебел и ентериер
Извршува работни задачи во производството на мебел, ентериер и градежна столарија; изработува техничко-технолошка документација, оперативна подготовка и нормирање; подготвува дрво, плочи и помошни материјали; изработува шаблони, подлога за тапацир, ѕидни панели, платна за тавани или прекривки за мебел; крои и шие материјали за тапацир; составува полупроизводи и производи, одржува, контролира и поправа; пресметува цена и продажба на готов производ; изработува елементи и производи од мебел, градежна столарија и специјални производи.
Можности за вработување: Оператор за подготовка на производството; оператор со технолошки процеси за обработка на дрво и плочи; оператор за изработка на меки делови кај мебелот и внатрешна декорација.
Тригодишно образование
Струки со тригодишно образование: електротехничка, машинска, градежна. Текстовите подолу се од официјалниот водич на квалификациите.
Електротехничка струка
Електромеханичар
Сервисира и одржува помали куќни електрични апарати и рачен електричен алат; дијагностицира дефекти кај трансформаторите и вртливите електрични машини на наизменична и еднонасочна струја; сервисира и одржува трансформатори и вртливи машини; изработува, вметнува и поврзува намотки; применува постапки за мерење и испитување.
Можности за вработување: Електромеханичар за погон; за разладни и термички уреди; за намотување (виклување); за куќни апарати и уреди и други работни места во доменот на квалификацијата. Можност за продолжување кон четиригодишни профили.
Електромеханичар за КТТ
Трогодишната квалификација електромеханичар за компјутерска техника и технологија во водичот е поврзана со четиригодишниот профил Електротехничар за компјутерска техника и автоматика. За опис на работните задачи на повисокото ниво во водичот се наведени: работа со хардверски и софтверски решенија, инсталација и одржување на мрежа, сервис на компјутери и опрема и програмирање со микроконтролери.
Можности за вработување (три години): Електромеханичар за компјутерски хардвер и електромеханичар за компјутерска технологија, како и други работни места од областа на електро-механичарските работи за компјутерска техника и технологија.
Машинска струка
Автомеханичар
Одржува и поправа лесни моторни возила; демонтира и монтира мотор и составни делови со внатрешно согорување; ја контролира работата и ги отстранува неисправностите на подвижните и неподвижните делови и системи на моторот; одржува електрични уреди, напојување, подмачкување и ладење; менува акумулатор, алтернатор, стартер и др.; менува пневматици и урамнотежува тркала; одржува системи за безбедност (ABS, TCS, воздушни перничиња); контролира сопирање, управување и потпирање.
Можности за вработување: Автомеханичар во автомобилската индустрија или сопствен бизнис.
Инсталатер за греење и климатизација
Изработува елементи и потсклопови за инсталација со централно греење и климатизација; сече, обликува и спојува цевки и елементи, делови од лим и профили; монтира грејни тела, котли, пумпи, компресори, термостати и електрични/електронски компоненти според цртежи и упатства; управува и одржува уреди и инсталации за греење; изработува и монтира елементи за климатизација.
Можности за вработување: Инсталатер за греење или инсталатер за климатизација.
Градежна струка
Тесар, армирач и бетоничар
Според водичот, градежништвото е индустрија на градење: постапка на правење, одржување, поправање и подобрување на градби и објекти. Учениците стекнуваат практични знаења од армирање, бетонирање и тесарење (препознавање на материјали, дрво и дрвени граѓи, армирање на градежни елементи).
Во официјалниот преглед на квалификациите, трогодишната насока кон градежен техничар вклучува и профилот монтер за сува градба: завршна обработка на површини, гипскартон, изолации, преградни и обложни ѕидови, спуштени тавани и подови, подготовка пред бои и премази.
Можности за вработување: Изведба на градежни работи на градилиште; според водичот, понатаму кон четиригодишно образование: соработник за техничка документација за градежни работи и оператор за изведба и контрола на градежни работи.